نظم برائے معصوم شہیدان آرمی پبلک سکول پشاور – Chitral Express

Premier Chitrali Woolen Products

نظم برائے معصوم شہیدان آرمی پبلک سکول پشاور

نور ولی شاہ انور کجو

مہ شیرین نان کی یا بیسیر مہ لیان دی سے ماژیسیر
مہ بوٹھان مشکی انگیتی مہ بستو دی سے لوڑیسیر
کپالاری مہ لئے گیتی سوم غیچھان دی مہ گانیکو۔۔۔چوٹاوا لئے مہ زمینہ سورو کوشکی کی گانیسیر

بوتی فروخان تے ظالمان تھوکین ناسارا دیکو
مہ ملگیریو کلمو ہواز اللہ ہو رے کارا دیکو
مہ نسہ روپھیرو کایو کھماڑ چھیتی ہارا دیکو
بادیلہ گانیکو چارہ بازووا کی طاقت بیسیر۔۔۔مہ شیرین نان کی یا بیسیر مہ لیان دی سے ماژیسیر

تان سکولوت کیہ تمنا کیہ ارمانہ گیتی استام
گویا کی تان دورار نیسی ای چمانہ گیتی استام
نہ فوجیان کورا دارک کوس اوانہ گیتی استام
بیرائے سادہ مہ محافظ کینو اولوئی مو مو دوسیسیر۔۔۔مہ شیرین نان کی یا بیسیر مہ لیان دی سے ماژیسیر

استاذانان پروشٹہ انگیاؤ معصومانان کوشیتانی
شیر رییاؤ میت تان سوروتے البت لوٹ موش جوشیتانی
جہنم ہوئے میتان ژاغہ ہاتو غیری پوچیتانی
مہ پاک اللہ ای مکالہ میتان حالو کی پاشیسیر۔۔۔۔مہ شیرین نان کی یا بیسیر مہ لیان دی سے ماژیسیر

بہادیر معصومان روپھئے می کافران ژیرا پرانی
شپیرو غون لیا توری تھے کی ہامیت خیرا پرانی
ارض پاکو معصومانان چاقیے چاقیے تیرا پرانی
کاش گیتی کی کا اندرینی می داریندان کی داڑیسیر۔۔۔مہ شیرین نان کی یا بیسیر مہ لیان دی سے ماژیسیر

شہید یاسر زندہ بہچوس تہ نام وا کھور کیہ وت نو بوئے
ھیہ مکتب تہ نامہ تان ھیہ وا خور کیہ وت نو بوئے
اسپہ گوسی تہ نسوتے یہ کوستے دور کیہ وت نو بوئے
نان ہائے ریکو ای مکالہ یاسر غیچھا ن کی ہوریسیر۔۔۔۔مہ شیرین نان کی یا بیسیر مہ لیان دی سے ماژیسیر

ملکو معصوم شہیدانان جنت پسہ حوران پسہ
ہائی گیرو رویان موژی اللہ ہو خاص مہمان پسہ
گونیان ریکو شیلینیان بہشٹہ دی دوران پسہ
محل پسہ می باغ پسہ جنتو می خوبان پسہ
کوشکہ نیشے دی نیگینیان موخو گیرو لیان پسہ
گانیتامی شہادتو وا خور نیکی ارمان پسہ
انور توری ہاتے لمحہ تے ظالمان کی ماریسیر۔۔۔مہ شیرین نان کی یا بیسیر مہ لیان دی سے ماژیسیر
مہ بوٹھان مشکی انگیتی مہ بستو دی سے لوڑیسیر
کپالاری مہ لئے گیتی سوم غیچان دی مہ گانیکو
چوٹاوا لئے مہ زمینہ سورو کوشکی کی گانیسیر

اس خبر پر تبصرہ کریں۔ چترال ایکسپریس اور اس کی پالیسی کا کمنٹس سے متفق ہونا ضروری نہیں
دوسروں کے ساتھ اشتراک کریں

یہ خبر بھی پڑھیں

منقبت بایاداَمام حسین

 ۔۔۔۔۔۔سیدنذیرحسین شاہ نذیر کوستے ہش حاصل نوبوئے مرتبا حسینوغون تان ژانوفدانوکوئے کربلا حسینوغون آقائے نامداروای ...

اترك تعليقاً