وزیراعظم کے دورہ چترال پر اپر چترال کے نمائندوں کو پروگرام میں شرکت کی دعوت نامے جاری نہ کرنے پر نائب تحصیل ناظم فخرالدین کی انتظامیہ پر تنقید 

چترال ( نمائندہ آئین)نائب تحصیل ناظم فخرالدین نے وزیر اعظم پاکستان شاہد خاقان عباسی کے گولین گول ہائیڈرو پاؤر اسٹیشن کے افتتاح کے موقع پر اور بعد میں ڈی سی چترال کے دفترمیں معتبرات کے ساتھ نشست میں اپر چترال سے تعلق رکھنے والے کسی بلدیاتی نمائندے کو پروگرام میں شامل نہ کرنے کو قابل مذمت قرار دیتے ہوئے کہا کہ یہ اپر چترال کے عوام کی مینڈیٹ کی توہین ہے۔ ایک اخباری بیان میں انہوں نے وزیراعظم پاکستان شاہد خاقان عباسی کے دورہ چترال کے پروگرام کومرتب کرنے والوں کو شدید تنقید کا نشانہ بناتے ہوئے کہاکہ مستوج کے تحصیل ناظم ، نائب تحصیل ناظم اور دوسرے معتبرات کو اس پروگرام سے دور رکھنا نہایت افسوسناک بات ہے جس سے اپر چترال کی ڈیڑھ لاکھ آبادی کی دل آزاری ہوئی ہے ۔ انہوں نے متعلقہ حکام اور حلقوں سے مطالبہ کیا ہے کہ وہ اپنی غلطی کو تسلیم کرتے ہوئے مستوج سب ڈویژن کے عوام سے غیر مشروط معافی مانگ لیں۔

اس خبر کو پرنٹ میں حاصل کریں