ایس آر ایس پی کی گولین ہائیڈروپاؤر اسٹیشن سے بجلی کی فراہمی پر ضلعی حکومت، ایس آرا یس پی اور پیسکو میں مفاہمت طے پاگئی
چترال (نمائندہ چترال ایکسپریس) چترال شہر اور مضافات میں بجلی کی شدید قلت سے صارفین کو نجات دلانے کے لئے ایس آر ایس پی کی گولین ہائیڈروپاؤر اسٹیشن سے بجلی کی فراہمی پر ضلعی حکومت، ایس آرا یس پی اور پیسکو میں مفاہمت طے پاگئی جس کے مطابق علاقے کو دو حصوں میں تقسیم کرکے بار ی باری چوبیس گھنٹوں کے لئے بجلی فراہم کی جائے گی۔ اتوار کے روز ٹاؤن ہال میں ضلع ناظم مغفرت شاہ کی طرف سے بلائی گئی اجلاس میں طے پایا کہ گولین بجلی گھر کی بجلی کی ڈسٹری بیوشن کے لئے پیسکو ایس آرا یس پی کو لائن مین جبکہ ڈسٹرکٹ گورنمنٹ اور انتظامیہ سپورٹ فراہم کرے گی۔ اس موقع پر ایم پی اے سلیم خان، اے سی چترال عبدالاکرم ، ڈی پی ایم، ایس آر ایس پی طارق احمد،ڈی ایس پی ہیڈ کوارٹر محی الدین ایس ڈی او پیسکو ارشد قریشی ، پاؤر کمیٹی کے صدر خان حیات اللہ خان ،ممبر ڈسٹر کٹ کونسل شہزادہ خالد پرویزاور ویلج ناظمین موجود تھے ۔ضلعی ناظم مغفرت شاہ نے کہا کہ یوسی وی سی ناظمین بجلی کی ڈسٹری بیویشن میں اپنا کردار ادا کریں اور میں بھی اپنی خدمات دینے کے لئے تیار ہو۔اُنہوں نے کہا ایس ایس آر ایس پی لوگوں کو سروس دینے میں مکمل طورپر ناکا م ہوچکی ہے۔اور بجلی گھر کو جلد از جلد کمیونٹی کو حوالہ کریں۔اُنہوں نے کہا کہ میں پاؤر کمیٹی کوبجلی گھر کی ذمہ داری سنبھالنے کے لئے اور چترال ٹاون کے لئے علیحدہ ٹرانسمیشن لائین بچھانے کیلئے 50لاکھ روپے ،اُن کیلئے دفتر اور انجینئر دینے کی بات پر اب بھی قائم ہوں۔ ایم پی اے سلیم خان نے مختصر خطاب میں کہاکہ کم وولیٹیج کے مسئلے پر میں اعلیٰ حکام سے بات کرونگا اور بہت جلد اس مسئلے کا نکل آئیگا چترال کے عوام اکتوبر تک صبر کا مظاہر ہ کریں 108/میگاواٹ بجلی گھر کاافتتاح عنقریب ہونے والا ہے جس سے چترال میں بجلی کا مسئلہ مستقل طورپرحل ہوجائیگا اُنہوں نے کہا کہ ایس آرایس پی کو بجلی کی ڈسٹری بیویشن کے لئے مزید لائین مینوں کی ضرورت پڑے تو اُنہیں مزید نفری فراہم کی جائیگی۔ممبرڈسٹرکٹ کونسل شہزادہ خالد پرویز نے کہا کہ ڈسٹری بیوشن کی تمام تر زمہ داری ایس آر ایس پی پر ڈالنا ظلم ہے۔ایس آر ایس پی نے بجلی گھر بنایا اور اب ڈسٹری بیویشن واپڈا کی زمہ داری ہے اور ضلعی انتظامیہ کی طرف سے صر ف دو لائن مین ڈسٹری بیوشن کے لئے دینا بھی ناکافی ہے۔
اجلاس میں فیصلہ ہوا کہ گولین بجلی کو اتوار کے دن دنین، جغور، بکرآباد تا موڑین گول فراہم کی جائے گی اور دوسرے دن موڑین گول سے بازار اور چیوڈوک تک کے علاقوں میں فراہم ہوگی اور یہ شیڈول رمضان کے اختتام تک جاری رہے گا۔ یہ بات قابل ذکر ہے کہ جس علاقے میں گولین بجلی کی باری نہ ہو، وہاں نیشنل گرڈ کی بجلی دی جائے گی۔ اجلاس میں کثیر تعداد میں ٹاون کے بجلی صارفین اور پاؤر کمیٹی کے ارکان موجود تھے۔ تاہم رات8:40بجے تک متعلقہ علاقوں کو شیڈول کے مطابق گولین دو میگاواٹ بجلی گھر سے بجلی نہ ملنے کی اطلاعات ہے بجلی کی حالت بہتر ہونے کی بجائے ابتر ہوگئی ہے۔وولٹیج انتہائی کم ہونے کی وجہ سے زیرہ بلب بھی جلنے سے قاصر ہے