بالائی چترال کے تریچ روڈ پر برف کا تودہ گرنے سے روڈ آمدو رفت کیلئے مکمل طور پر بند
چترال ( محکم الدین )بالائی چترال کے تریچ روڈ پر برف کا تودہ گرنے سے روڈ آمدو رفت کیلئے مکمل طور پر بندہو چکا ہے ۔ موڑکہو پولیس کے مطابق برف کا یہ تودہ گذشتہ روز گرا جس کے بعد آمدورفت معطل ہوئی ہے ۔ اور لوگ پیدل چلنے پر مجبور ہوئے ہیں ۔ جس سے مسافروں خصوصا خواتین ، بچوں ، مریضوں کو ہسپتال پہنچنے اور دیگر ضروریات کیلئےجانے میں مشکلات کا سامنا ہے ۔ تودہ گرنے سے دونوں طرف کئی گاڑیاں پھنس گئی ہیں ۔ حالیہ بارشوں کے ساتھ کئی مقامات میں نئی برف پڑی ہے ۔ مڈک لشٹ ، کالاش ویلیز کے بالائی حصے، لٹکوہ کے مقامات گبور ، بگوشٹ اور پرابیک ان میں شامل ہیں ۔ تاہم پرابیک میں بر ف کی مقدار کم تھی ۔ نئی بارشوں سے پہاڑوں میں برف کا بڑا ذخیرہ جمع ہو چکا ہے ۔ ندی نالوں میں پانی کی مقدار میں اضافہ ہوا ہے ۔ جس سے پانی کی کمی کے شکار بجلی گھروں کی پیداوار بڑھ گئی ہے ۔ اور لوڈ شیڈنگ میں بتدریج کمی آرہی ہے ۔ مقامی لوگ حالیہ بارشوں کو فصلوں ، باغات جنگلات اور ماحول کیلئے بہت اہم قرار دے رہے ہیں ۔ بارش اور برفباری کے باوجود لواری ٹنل سمیت مستوج ، مڈک لشٹ ، کالاش ویلیز ،لاسپور تورکہو اور موڑکہو روڈ متاثر نہیں ہوئے ہیں ۔ اور آمدورفت جاری ہے ۔ تاہم گرم چشمہ روڈ پرکاست کے مقام پر ٹرک پھنس جانے کی وجہ سے لوگوں کو گاڑیاں کراس کرنے میں دشواری پیش آرہی ہے ۔ بارش اور برفباری سے سردی میں ایک مرتبہ پھر اضافہ ہوا ہے ۔
