جامعہ چترال میں امسال مزید دو نئے شعبہ جات، زراعت، اور اسلامیات کا قیام عمل میں لایا جارہا ہے جس کے بعد شعبہ جات کی تعداد تیرہ(13)ہوجائے گی

  چترال (نمائندہ چترال ایکسپریس)جامعہ چترال ایک پبلک سیکٹر یونیورسٹی ہے جس کا قیام گیارہ (11) شعبہ جات کے ساتھ 2017میں کیا گیا۔امسال مزید دو نئے شعبہ جات، زراعت، اور اسلامیات کا قیام عمل میں لایا جارہا ہے جس کے بعد شعبہ جات کی تعداد تیرہ(13)ہوجائے گی۔ جامعہ چترال میں طلباء کی سہولت کے لئے فیسوں کی ادائیگی، وظائف اور دیگر سہولیات کا ایک مربوط نظام موجود ہے انتظامیہ کی کاؤشوں سے 80فیصد طلباء کو کیلاش، بیت المال اور احساس اسکالرشپ کی صورت میں مفت تعلیم فراہم کی جارہی ہے۔گذشتہ سال جامعہ چترال نے 250سے زائد طلباء کو احساس اسکالرشپ دی امسال ہائیر ایجوکیشن کمیشن نے فنڈ کی کمی کے باعث ملک بھر کی جامعات کے و ظائف میں 90فیصد سے زائد کٹوتی کی۔جسکی وجہ سے جامعہ چترال بھی متاثر ہوا اس سلسلے میں وائس چانسلر پروفیسر ڈاکٹر ظاہر شاہ نے چئیرمین ہائیر ایجوکیشن ڈاکٹرمختار احمد سے بذات خود ملاقات کرکے جامعہ چترال کے طلباء کو زیادہ سے زیادہ وظائف دینے کی درخواست کی جسے چئیرمین ہائیر ایجوکیشن نے منظورکرکے جلد وظائف دینے کی یقین دہانی کروائی۔
علاوہ ازیں وائس چانسلر نے سینٹ کی سٹینڈنگ کمیٹی برائے ایجوکیشن میں طلباء کو درپیش مالی مسائل مشکلات کے حوالے سے تفصیلی بریفنگ دی اور کمیٹی سے درخواست کی کہ حالیہ سیلابی نقصانات کے تناظر میں جامعہ چترال کے طلباء کی کم از کم دو سمسٹر کی فیس معاف کی جائے۔ سنیٹر فلک ناز اور سینیٹر  مشتاق احمد کی بھر پور تائید کی بدولت سینٹ کی سٹینڈنگ کمیٹی نے وائس چانسلر کی طرف سے پیش کی گئی درخواست منظور کرتے ہوئے قومی اورصوبائی حکومت کو اس سلسلے میں ایک قرار داد بھیجنے کی منظوری دے دی ہے جس پر عنقریب عمل درآمد کی توقع ہے۔اس کے ساتھ ساتھ وائس چانسلر جامعہ چترال نے جامعہ چترال کی انتظامیہ کو ہدایت جاری کی کہ وہ قومی اور بین الاقوامی اداروں کے سامنے طلباء کے مالی مسائل اجاگر کریں اور زیادہ سے زیادہ وظائف کا حصول یقینی بنانے کے لیے ہر ممکن تگ و دو کریں۔

اس خبر کو پرنٹ میں حاصل کریں