یونیورسٹی آف چترال میں گرین ڈے منایا گیا۔
چترال(چترال ایکسپریس) یونیورسٹی آف چترال نے محکمہ نباتات اور محکمہ جنگلات کے اشتراک سے 21 ستمبر 2023 کو
گرین ڈے کی شاندار تقریب کا انعقاد کیا جس کا مقصد ماحولیاتی آگاہی کو فروغ دینا اور درخت لگانے کی اہمیت پر زور دینا تھا۔
جس میں یونیورسٹی آف چترال کے وائس چانسلر پروفیسر ڈاکٹر ظاہر شاہ نے
بطور مہمان خصوصی شرکت کی۔ اپنے خطاب میں انہوں نے درخت لگانے کی اہمیت پر زور دیا اور اسلام میں درخت لگانے کی اہمیت کے بارے میں قرآن پاک کے حوالہ جات پیش کئے۔
دروش کے سب ڈویژنل فارسٹ آفیسر عمیر نواز نے چترال میں جنگلات کے متنوع ماحولیاتی نظام کے بارے میں ایک جامع پریزنٹیشن پیش کی اور ان اہم قدرتی وسائل کے تحفظ میں محکمہ جنگلات کے اہم کردار پر روشنی ڈالی۔
چترال کے سب ڈویژنل فارسٹ آفیسر محمد یوسف فرہاد نے 
گلوبل وارمنگ سے نمٹنے میں جنگلات کے اہم کردار اور کاربن ڈائی آکسائیڈ کو جذب کرنے کی صلاحیت کی طرف توجہ مبذول کروائی۔ انہوں نے طلباء پر زور دیا کہ وہ درخت لگانے کے اقدامات میں فعال حصہ لے کر گلوبل وارمنگ کے خلاف جنگ میں تبدیلی کے سرگرم ایجنٹ بنیں۔
تقریب کے فوکل پرسن، یونیورسٹی آف چترال کے شعبہ نباتیات کے لیکچرار جناب حفیظ اللہ نے
تمام مہمانوں اور شرکاء کا پرتپاک خیرمقدم کرتے ہوئے ماحولیاتی پائیداری اور تحفظ کی کوششوں کے لیے یونیورسٹی کے عزم پر زور دیا۔
وائس چانسلر پروفیسر ڈاکٹر ظاہر شاہ اور محکمہ جنگلات کے افسران نے مشترکہ طور پر یونیورسٹی کے لان میں
درختوں کے پودے لگائے۔ انہوں نے فیکلٹی ممبران اور طلباء میں پودے بھی تقسیم کئے۔
محکمہ جنگلات کی شراکت داری اور غیر متزلزل تعاون کے اعتراف میں 
وائس چانسلر پروفیسر ڈاکٹر ظاہر شاہ نے محکمہ جنگلات کے افسران کو شیلڈز پیش کیں۔
یونیورسٹی آف چترال اپنے طلباء اور وسیع تر کمیونٹی میں ماحولیاتی شعور کو فروغ دینے کے لیے وقف ہے اور ماحولیاتی تحفظ اور موسمیاتی تبدیلیوں کے خاتمے میں اہم کردار ادا کرنے کے لیے پرعزم ہے۔
