دروش: طوفان گول کلکٹک میں دوبارہ شدید سیلاب، متعدد گھرانے تباہ، متاثرین کھلے آسمان تلے مدد کے منتظر
چترال (چترال ایکسپریس)گزشتہ رات ہونے والی تیز بارش کے نتیجے میں دروش کا علاقہ طوفان گول کلکٹک ایک بار پھر شدید سیلاب کی زد میں آ گیا، جس سے سیلابی نالے کے دونوں جانب واقع متعدد گھرانوں کو شدید نقصان پہنچا ہے۔ سیلاب کی بے رحم لہریں معروف سیاسی و سماجی شخصیت اور شاعر صلاح الدین طوفان کا گھر بھی مکمل طور پر بہا لے گئیں۔
ان خیالات کا اظہار دروش کی
ممتاز سیاسی و سماجی شخصیت حاجی شفا نے میڈیا سے گفتگو کرتے ہوئے کیا۔ انہوں نے علاقے کی ابتر صورتحال پر گہری تشویش کا اظہار کیا ہے۔
حاجی شفا نے حکومتی اداروں اور منتخب نمائندوں کی غفلت پر افسوس کا اظہار کرتے ہوئے کہا:
”انتہائی افسوس کا مقام ہے کہ اس ناگہانی آفت کے باوجود ابھی تک پی ٹی آئی کے مقامی ایم پی اے، ایم این اے، سینیٹر، ڈپٹی اسپیکر یا ڈسٹرکٹ ایڈمنسٹریشن، این ڈی ایم اے (NDMA) اور پی ڈی ایم اے (PDMA) کا کوئی بھی نمائندہ متاثرین کی داد رسی کے لیے موقع پر نہیں پہنچا۔”
سیلاب متاثرین کی حالتِ زار
حاجی شفا نے مزید بتایا کہ:
کلکٹک طوفان گول کے سیلاب متاثرین، جن میں خواتین، بچے اور بوڑھے شامل ہیں، اس وقت شدید کسمپرسی کی حالت میں ہیں۔
متاثرہ خاندان گھر بار تباہ ہونے کے بعد ایک درخت کے نیچے، کھلے آسمان تلے کسی مسیحا کے منتظر ہیں۔
دس بارہ دن پہلے بھی آنے والے سیلاب سے صلاح الدین طوفان سمیت تقریباً 20 گھرانے متاثر ہوئے تھے، اور کل رات کے دوسرے سیلاب نے رہی سہی کسر بھی نکال دی اور ان کا سب کچھ بہا کر لے گیا۔
حاجی شفا اور اہل علاقہ نے حکومتِ وقت، پی ڈی ایم اے اور مخیر حضرات سے پرزور مطالبہ کیا ہے کہ طوفان گول کلکٹک کے سیلاب متاثرین کو فی الفور ٹینٹ، خوراک اور طبی امداد فراہم کی جائے اور ان کی بحالی کے لیے ہنگامی بنیادوں پر اقدامات اٹھائے جائیں۔
