یارخون اور بروغول کے عوام کو سفری سہولیات کی فراہمی ریاست کی بنیادی ذمہ داری ہے، نیاز احمد نیازی ایڈوکیٹ
چترال (چترال ایکسپریس) معروف قانون دان اور انسانی حقوق کے سرگرم رہنما نیاز احمد نیازی ایڈوکیٹ نے ایک اخباری بیان میں یارخون اور بروغول کے عوام کے بنیادی انسانی حقوق کا دفاع کرتے ہوئے، علاقے میں سڑک اور سفری سہولیات کی عدم موجودگی کے خلاف نکالے جانے والے لانگ مارچ کی مکمل حمایت کا اعلان کر دیا ہے۔
انہوں نے وفاقی اور صوبائی حکومت سے پرزور مطالبہ کیا ہے کہ وہ اس دور افتادہ علاقے کے عوام کے دیرینہ مسائل کا فوری نوٹس لیں اور ان کے بنیادی آئینی و انسانی حقوق، یعنی آمدورفت کے سنگین مسئلے کو ترجیحی بنیادوں پر حل کرتے ہوئے سڑک کی تعمیر کے لیے فوری فنڈز اور انتظامات کا بندوبست کریں۔
اپنے بیان میں نیاز احمد نیازی ایڈوکیٹ نے گہرے تعجب اور افسوس کا اظہار کرتے ہوئے کہا:
”سڑکوں کی تعمیر اور سفری بنیادی ڈھانچے (انفراسٹرکچر) کی فراہمی کسی بھی فلاحی ریاست کی بنیادی ترین ذمہ داریوں میں شامل ہے۔ انتہائی افسوس کا مقام ہے کہ قیامِ پاکستان کے 75 سال سے زائد کا عرصہ گزر جانے کے باوجود ریاست اپنے ہی شہریوں کو سڑک جیسی بنیادی سہولت فراہم کرنے میں ناکام نظر آتی ہے، جو کہ پوری مقتدرہ اور حکومت کے لیے ایک لمحہ فکریہ ہے۔”
انہوں نے واضح کیا کہ یارخون اور بروغول کی عوام کو مزید محرومیوں کا شکار نہیں رکھا جا سکتا۔ پسماندگی کے خاتمے اور مواصلاتی نظام کی بہتری کے لیے حکومت کو اب لیت و لعل سے کام لینے کے بجائے عملی اقدامات اٹھانے ہوں گے، تاکہ شہریوں کو ان کا جائز اور قانونی حق مل سکے۔
