ٹی ایم اے چترال کی سیلاب سے متاثرہ علاقوں میں بحالی اور ریلیف سرگرمیاں تیز، اہم شاہراہیں اور واٹر سپلائی سکیمیں زیرِ معائنہ
چترال (چترال ایکسپریس)تحصیل میونسپل ایڈمنسٹریشن (ٹی ایم اے) چترال کے تحریکِ بحالی و امداد کے تحت ٹی ایم او حیدر ایوب خان اور ٹی او آئی محمد یونس نے دیگر حکام اور ہنگامی عملے کے ہمراہ سیلاب سے متاثرہ مختلف دیہات کا دورہ کیا، جہاں انہوں نے بنیادی ڈھانچے کو پہنچنے والے نقصانات کا جائزہ لیا اور جاری ریلیف کاموں کا معائنہ کیا۔
تفصیلات کے مطابق ٹی ایم اے کی ٹیم نے ڈپٹی ڈائریکٹر این ایچ اے کے ہمراہ سیلاب سے متاثرہ گاؤں بروز کا دورہ کر کے آبپاشی کے تباہ شدہ ہیڈ ورکس کا جائزہ لیا۔ 
اس کے بعد ٹیم نے گاؤں پریت کا دورہ بھی کیا، جہاں سیلاب سے سڑکوں، پلوں اور دیگر عوامی بنیادی ڈھانچے کو پہنچنے والے نقصانات کا تفصیلی معائنہ کیا گیا۔
عوام کو پینے کے صاف پانی کی فراہمی یقینی بنانے کے لیے ٹی ایم او حیدر ایوب خان نے امدادی ٹیموں کے ساتھ سیلاب سے متاثرہ گاؤں جغور کا دورہ کیا۔
اس موقع پر انہوں نے وہاں جاری ریلیف سرگرمیوں کا جائزہ لیا اور متاثرین کے لیے نصب کردہ ہنگامی واٹر ٹینکوں کا معائنہ کیا تاکہ مقامی آبادی کو پینے کے صاف پانی کی بلاعطل فراہمی یقینی بنائی جا سکے۔
علاوہ ازیں، چیو پل چترال کے قریب ‘انگارغون واٹر سپلائی سکیم’ کے زیرِ تعمیر چیمبر کا معائنہ بھی کیا گیا، جو چترال–شندور روڈ کی تعمیر کے دوران متاثر ہوا تھا اور اس کی 
بحالی کا کام تیزی سے جاری ہے۔
دوسری جانب، ٹی ایم اے چترال کی ڈبلیو ایس یو (WSU) ٹیکنیکل ٹیم نے فوری کارروائی کرتے ہوئے گھٹک، دنین میں سیلاب سے متاثرہ واٹر سپلائی ڈسٹری بیوشن لائن کی کامیابی سے مرمت کر کے علاقہ مکینوں کے لیے پانی کی فراہمی بحال کر دی ہے۔
