یونیورسٹی آف چترال میں 79واں یومِ آزادی ملی جوش و جذبے سے منایا گیا
پروگرام میں پرچم کشائی، شجرکاری، کیک کاٹنے کی تقریب، یومِ آزادی واک اور ملی نغمے شامل؛ وائس چانسلر پروفیسر ڈاکٹر حاظر اللہ کا بحیثیت مہمانِ خصوص خطاب
چترال (چترال ایکسپریس):یونیورسٹی آف چترال میں پاکستان کا 79واں یومِ آزادی قومی و ملی جوش و جذبے اور حب الوطنی کے ساتھ منایا گیا۔ جشنِ آزادی کی تقریبات کا باقاعدہ آغاز وائس چانسلر پروفیسر ڈاکٹر حاظر اللہ نے یونیورسٹی پرچم فضا میں بلند کر کے (پرچم کشائی) کیا۔ اس موقع پر ملک و ملت کی سلامتی، امن، خوشحالی اور استحکام کے لیے خصوصی دعا کی گئی، جبکہ سرسبز پاکستان کے عزم کی تجدید کے لیے یونیورسٹی کیمپس میں شجرکاری بھی کی گئی۔
یومِ آزادی کی مرکزی تقریب یونیورسٹی کے مین ہال میں منعقد ہوئی جہاں وائس چانسلر پروفیسر ڈاکٹر حاظر اللہ مہمانِ خصوصی تھے۔ تقریب میں اساتذہ، افسران، ملازمین، طلبہ اور علاقے کی معزز شخصیات نے بڑی تعداد میں شرکت کی۔
تقریب سے خطاب کرتے ہوئے وائس چانسلر نے پوری قوم بالخصوص یونیورسٹی کمیونٹی کو یومِ آزادی کی مبارکباد دی۔ انہوں نے اساتذہ اور والدین پر زور دیا کہ وہ نئی نسل کو قیامِ پاکستان کے حقیقی مقاصد اور بانیانِ پاکستان کے افکار سے روشناس کرائیں۔ وائس چانسلر نے مفکرِ پاکستان علامہ محمد اقبال کے تصورِ پاکستان اور بابائے قوم قائداعظم محمد علی جناح کے ارشادات کی اہمیت کو اجاگر کرتے ہوئے طلبہ کو ہدایت کی کہ وہ “اتحاد، ایمان اور نظم و ضبط” کے زریں اصولوں کو اپنی زندگی کا شعار بنائیں۔
پروفیسر ڈاکٹر حاظر اللہ نے قائداعظم کے 21 مارچ 1948 کے ڈھاکہ میں طلبہ سے تاریخی خطاب کا حوالہ دیتے ہوئے کہا کہ نوجوان تمام تر توجہ تعلیم پر مرکوز کریں اور ملک کی ترقی میں فعال کردار ادا کریں۔ انہوں نے تاریخی پس منظر بیان کرتے ہوئے کہا کہ قیامِ پاکستان کے وقت ملک میں صرف ایک یونیورسٹی تھی، جبکہ آج 270 سے زائد جامعات اعلیٰ تعلیم اور انسانی وسائل کی ترقی میں اہم کردار ادا کر رہی ہیں۔ انہوں نے پاکستان کی دفاعی صلاحیتوں کا ذکر کرتے ہوئے نوجوانوں کو تعلیم، محنت اور قومی یکجہتی کے ذریعے ملک کی خدمت کرنے کا درس دیا۔
تقریب کے دوران پاکستان کے قومی ہیروز کی قربانیوں کو خراجِ تحسین پیش کرنے کے لیے ایک دستاویزی فلم بھی دکھائی گئی، جبکہ طلبہ نے اردو اور انگریزی زبانوں میں تقاریر کیں۔ پروگرام میں قومی ترانے، ملی نغمے، آزادی کا کیک کاٹنے کی تقریب اور یومِ آزادی واک کا اہتمام بھی کیا گیا۔ تقریب کے اختتام پر پاکستان کے امن، استحکام اور پیش رفت کے لیے بالخصوص دعا کی گئی۔
