ڈی پی او لوئر چترال ریشم جہانگیر کا بڑا اقدام: منشیات فروشوں کے اثاثے منجمد کرنے کا عمل شروع
چترال (چترال ایکسپریس)لوئر چترال میں منشیات کے مکمل خاتمے اور اس کے مکروہ دھندے میں ملوث عناصر کی سرکوبی کے لیے پولیس نے تاریخی اور فیصلہ کن اقدامات کا آغاز کر دیا ہے۔ ڈسٹرکٹ پولیس آفیسر (ڈی پی او) لوئر چترال ریشم جہانگیر کے احکامات پر منشیات فروشوں کے خلاف جاری کریک ڈاؤن کو مزید سخت کرتے ہوئے، ان کے غیر قانونی اثاثے منجمد کرنے کا باقاعدہ عمل شروع کر دیا گیا ہے۔
اس سلسلے میں ڈی پی او لوئر چترال ریشم جہانگیر نے بتایا کہ منشیات کے زہر کو جڑ سے اکھاڑ پھینکنے کے لیے صرف گرفتاری ہی کافی نہیں، بلکہ ان عناصر کا معاشی شریان کاٹنا انتہائی ضروری ہے۔ انہوں نے کہا کہ ضلع بھر میں فعال اور نامزد منشیات فروشوں کی منقولہ و غیر منقولہ جائیدادوں، گاڑیوں اور بینک اکاؤنٹس کی تفصیلات جمع کر لی گئی ہیں، اور ان اثاثوں کو قانون کے مطابق منجمد کرنے کے لیے متعلقہ اداروں اور حکام سے خط و کتابت کا سلسلہ تیزی سے جاری ہے۔
ڈی پی او لوئر چترال نے واضح الفاظ میں تحریر کیا کہ:
“منشیات فروشی ایک سنگین اور نسل کش جرم ہے۔ معاشرے کو اس لعنت سے پاک کرنے کے لیے ہم آخری حد تک جائیں گے۔ جو لوگ ہماری نوجوان نسل کے مستقبل سے کھیل کر غیر قانونی اثاثے بنا رہے ہیں، قانون کی گرفت ان کے گرد تنگ کر دی گئی ہے اور ان کی جائیدادیں بحقِ سرکار ضبط کی جائیں گی۔”
پولیس حکام کے مطابق اس اقدام کا مقصد نہ صرف موجودہ منشیات فروشوں کی معاشی طاقت ختم کرنا ہے بلکہ ایسے عناصر کے لیے ایک عبرتناک مثال قائم کرنا ہے جو اس کٹھن جغرافیائی علاقے میں نوجوانوں کو منشیات کی دلدل میں دھکیل رہے ہیں۔
عوامی و سماجی حلقوں نے ڈی پی او ریشم جہانگیر کے اس جرات مندانہ اور جڑ سے خاتمے کے اقدام کا خیرمقدم کیا ہے اور امید ظاہر کی ہے کہ اس سے چترال میں منشیات کا خاتمہ ممکن ہو سکے گا۔ پولیس انتظامیہ نے عوام سے بھی اپیل کی ہے کہ وہ اپنے ارد گرد منشیات فروشوں کی نشان دہی کریں تاکہ ان کے خلاف بروقت قانونی و معاشی کارروائی عمل میں لائی جا سکے۔
