اهلسنت والجماعت چترال کے زیرِ اہتمام جنالی آیون میں عظیم الشان “دفاعِ صحابہ کانفرنس”، سیاسی و مذہبی قائدین کی شرکت

چترال(چترال  ایکسپریس)اہلسنت الجماعت چترال کے زیر اہتمام جنالی آیون میں ” دفاع صحابہ و استحکام پاکستان” کے موضوع پر ایک شاندار کانفرنس کا انعقاد ہوا ، جس میں جماعت اسلامی ، پاکستان مسلم لیگ ن ، عوامی نیشنل پارٹی کے ضلعی قائدین نے شرکت کی ، جبکہ بڑی تعداد میں صحابہ سے محبت کرنے والے آیون دروش اور چترال سے تعلق رکھنے والے فرزندان توحید اس عظیم الشان کانفرنس میں موجود تھے ، اس کانفرنس کی صدارت جماعت اہلسنت الجماعت چترال کے امیر ممتاز عالم دین و شعلہ بیان مقرر مولانا حافظ خوشولی خان نے کی ،

       کانفرنس سے خطاب کرتے ہوئے سابق ناظم آیون مفتی عماد الحق ، عنایت اللہ اسیر ، عبدالولی خان ایڈوکیٹ ، مولانا سراج الدین ندیم ، عیدالحسین، مولانا قاضی سلامت اللہ، مولانا شیر زمان خان نے کہا ، کہ دفاع صحابہ کا نفرنس کا انعقاد دراصل مسلمانوں کو بیدار کرنے کی بہت اچھی کوشش ہے ، دین صحابہ کرام کے ذریعے سے ہم تک پہنچا ہے ، لیکن آج بعض ناعاقبت اندیش لوگ ہماری غفلت کا فائدہ اٹھا کر صحابہ کی شان کے خلاف ہرزہ سرائی کر رہے ہیں ، جبکہ صحابہ کی شان یہ ہے ، کہ اللہ پاک نے قرآن پاک میں ان کی صفت اور خوبیاں خود بیان فرمائی ہیں۔ انہوں نے کہا ، کہ ہمیں اپنی آنکھیں کھلی رکھنے کی ضرورت ہے ، اگر ہم اسی طرح غفلت میں رہیں گے ، تو اغیار دین کو پارہ پارہ کرنے میں کوئی کسر نہیں چھوڑیں گے ، انہوں نے کہا ، کہ چترال میں کوئی صحابہ کی شان میں گستاخی کرے اور وہ ہم سے بچ جائے ، یہ کیسے ہو سکتا ہے ، ہم پر امن لوگ ہیں ، اور امن کو پسند کرتے ہیں ، اس لئے جو امن کو برقرار رکھنے کی کوشش کرے ،وہ ہمارے لئے قابل احترام ہے ،

انہوں نے کہا ، کہ اس دنیا میں آسمان کے نیچے اور زمین کے اوپر انبیاء کے بعد اگر انتہائی محترم اور شان والی ہستیاں ہیں ، تو وہ صحابہ کرام ہیں ، ان کو مقام و احترام نبی پاک صل اللہ علیہ وسلم کی صحبت اور ان کی غلامی سے ملی ، صحابہ نے نبی پاک کی تریسٹھ سالہ حیات طیبہ کو لمحہ بہ لمحہ دیکھا ، محفوظ کیا ،اور خود عمل کرنے کے ساتھ ساتھ دوسروں تک پہنچانے کا حق ادا کردیا ،

انہوں نے کہا ،کہ پاکستان اسلام کے نام پر بنا ہے ، اس لئے دفاع صحابہ سے ہی پاکستان کا استحکام ممکن ہے ، ہمیں اسلام ، صحابہ اور اپنے ملک سے محبت ہے ، اور اس محبت میں دراڑ پیدا کرنے کی کسی کو اجازت نہیں دی جائے گی ،

 کانفرنس میں تین قراردادیں متفقہ طور پر منظور کی گئیں ، جس میں مطالبہ کیا گیا ، کہ سوشل میڈیا میں صحابہ کی شان میں گستاخی کرنے والوں کو روکا جائے ، اور ان گستاخوں کو کڑی سزا دی جائے ، ہوشربا مہنگائی پر قابو پاکر غریب عوام کو ریلیف دی جائے ، ایک اور قرارداد میں پاکستان ، سعودی عرب اور ترکی کے مابین دفاعی معاہدے کی بھر پور 9حمایت کا اعلان کیا گیا

کانفرنس کے اختتام پر صدر اجلاس مولانا حافظ خوشولی خان ولی نے کہا ، کہ جس طرح ملک کی سرحدوں کی حفاظت نہ کرنے پر دشمن ملک کو نقصان پہنچا سکتا ہے ، اسی طرح ایمان کی حفاظت نہ ہونے کی صورت میں دین اسلام کو شدید نقصانات پہنچ سکتے ہیں ، ایمان کی یہ دولت ، قرآن ، نماز روزہ ، حج ، تبلیغ ، جہاد رسول پاک صل اللہ علیہ وسلم کے جان فدا صحابہ کے ذریعے ہم تک پہنچے ہیں ، اور دشمن کو معلوم ہے ، کہ دین اسلام میں پل کا کردار ادا کرنے والے صحابہ کے خلاف اعتراضات اٹھائے جائیں ، تو اسلام کے بنیادی ارکان اور قرآن پر انگلی اٹھانے کا زرین موقع ہاتھ آجائے گا ۔ اس لئے صحابہ کی کردار کشی کی مہم ڈھٹائی سے جاری ہے ،

انہوں نے کہا ، کہ ہم دفاع صحابہ کا یہ راستہ اس لئے نہیں چنا ، کہ اس راستے میں پھول بچھائے گئے ہیں ، بلکہ یہ کانٹوں سے بھری سیج ہے ، اس راستے پر ہمارے کئی اکابرین اپنی جانیں قربان کر چکے ہیں ، اور ہم بھی اسی راستے کے مسافر ہیں ،

انہوں نے کہا ، کہ آج مسلمان مسلمان کے خلاف ننگی تلوار بنا ہوا ہے ، اپنے سیاسی قائد کے خلاف ایک حرف بھی برداشت نہیں کرتے ، لیکن نبی پاک کے ساتھی صحابہ کے خلاف بات آئے ، تو ماتھے پر شکن تک نہیں آتے ، اس لئے میں آپ تمام مسلمانوں سے حضرات صحابہ کرام کی عزت و ناموس کی بھیک مانگتا ہوں ،

    مولانا حافظ خوشولی خان نے کانفرنس کے تمام شرکاء سے ناموس صحابہ کیلئے مال وجان قربان کرنے کیلئے ہاتھ اٹھا کرعہد لیا ، کانفرنس جماعت اسلامی کے مقامی رہنما سابق ناظم مولانا رحمت نعیم شاہ المعروف ( مولائی روم ) کے دعائیہ کلمات سے اختتام پذیر ہوا ۔

اس خبر کو پرنٹ میں حاصل کریں