جامعہ چترال کے ترقیاتی منصوبے کا جائزہ، کام کی رفتار تیز کرنے کی ہدایت

چترال (چترال ایکسپریس) جامعہ چترال کے پی ایس ڈی پی منصوبے “اسٹیبلشمنٹ آف دی یونیورسٹی آف چترال، فیز ون” سے متعلق پروجیکٹ اسٹیئرنگ کمیٹی (پی ایس سی) کا چھٹا اجلاس 28 اپریل 2026 کو وائس چانسلر جامعہ چترال کی زیر صدارت منعقد ہوا، جس میں منصوبے کی پیش رفت اور درپیش چیلنجز کا تفصیلی جائزہ لیا گیا۔

اجلاس میں پروجیکٹ ڈائریکٹر نے بریفنگ دیتے ہوئے بتایا کہ اکیڈمک بلاک پر تقریباً 50 فیصد جبکہ ہاسٹل منصوبے پر 45 فیصد تک کام مکمل ہو چکا ہے۔ کمیٹی نے پیش رفت کو تسلیم کرتے ہوئے خاص طور پر ہاسٹل کے کام میں سست روی پر تشویش کا اظہار کیا اور منصوبے کی بروقت تکمیل کے لیے کام کی رفتار تیز کرنے کی ہدایت کی۔

اجلاس میں تفصیلی غور و خوض کے بعد اس بات پر زور دیا گیا کہ پروجیکٹ لیڈ سخت اور وقت کی پابندی پر مبنی اہداف مقرر کریں اور باقاعدہ جائزہ اجلاسوں کے ذریعے نگرانی کے نظام کو مزید مؤثر بنایا جائے۔ اس کے ساتھ ساتھ متعلقہ اداروں کے درمیان بہتر رابطہ کاری پر بھی زور دیا گیا تاکہ تاخیر کے مسائل کو بروقت حل کیا جا سکے۔

کمیٹی نے مالی وسائل کے استعمال کا بھی جائزہ لیا اور اس بات کی ضرورت پر زور دیا کہ اخراجات کو منصوبے کی عملی پیش رفت کے مطابق رکھا جائے، خصوصاً ان شعبوں میں جہاں کام کی رفتار سست ہے۔ اجلاس میں یہ بھی فیصلہ کیا گیا کہ باقی ماندہ سامان اور انفراسٹرکچر کی خریداری تعمیراتی کام کی پیش رفت کے ساتھ مرحلہ وار شروع کی جائے گی۔

وائس چانسلر نے منصوبے کو جلد مکمل کرنے کے ساتھ ساتھ معیار اور ادارہ جاتی شفافیت برقرار رکھنے کی اہمیت پر زور دیا۔ اجلاس کے اختتام پر منصوبے کی بروقت تکمیل کے لیے مؤثر نگرانی اور مشترکہ کوششوں کے عزم کا اعادہ کیا گیا۔

اس خبر کو پرنٹ میں حاصل کریں