داد بیداد ۔۔روشنی کا سفر۔۔ڈاکٹر عنایت اللہ فیضی
آغوش الخدمت سے قاری فدا صاحب نے فون پر بتایا کہ آپ کے نام ایک امانت کتاب میرے پاس آئی ہے میں نے برجستہ پوچھا کتاب کا نام اور بھیجنے والے کا نام کیا ہے کہنے لگے روشنی کے مسافر اور ضیا ء چترالی، مجھے نام ہی سے رغبت ہوگئی روشنی اور ضیا میں رعایت لفظی اور جلالت معنوی موجود ہے کتاب ہاتھ آئی تو دل باغ باغ ہوا چترال کے نوجوان عالم دین اور مستند اہل قلم مولانا ضیا ء الرحمن چترالی نے 208نو مسلم شخصیات کے سوانخ شرح و بسط کے ساتھ جمع کر کے ان کی زندگی کے قبل از اسلام گوشوں کو طشت ازبام کرنے کے بعد ان کے قبول اسلام کی کہانی اور مسلمان ہونے کے بعد اسلام کی دعوت کے لئے ان کی خدمات کا جائزہ ایمان افروز اور نصیحت آموز اسلوب میں پیش کیا ہے،
دلچسپ بات یہ ہے کہ جن شخصیات کو اس کتاب کے لئے چنا گیا ہے وہ قبول اسلام سے پہلے اپنے اپنے شعبوں میں نمایاں مقام رکھتے تھے اور شہرت کی بلندیوں کو چھورہے تھے انگریزی میں ان کو سیلبریٹی (Celebority) کا مقام حاصل تھا اگر اعداد شمار کی زبان میں بات کی جائے تو کتاب کے لئے چُنے ہوئے عظیم لوگوں میں 33شخصیات کا تعلق علمی دنیا سے ہے، 20شخصیات ایسی ہیں جن کو مسلمان ہونے سے پہلے سابق مذہب کے عالموں میں ممتاز مقام حاصل تھا 24شخصیات کا تعلق فلمی دنیا سے تھا، 23ایسی شخصیات ہیں جن کو کھیلوں میں نمایاں درجہ حاصل تھا، 8ایسی شخصیات ہیں جو قبول اسلام سے پہلے اسلام دشمنی کے لئے بدنام تھے 6شخصیات کا تعلق جرائم پیشہ افراد سے تھا 4ممتاز صنعتکار اور تاجر ہیں، 9فو جی کما نڈر ہیں، ان میں 14نما یاں خواتیں شامل ہیں نو مسلم بچوں کی تعداد 19جبکہ نو جوا نوں کی تعداد 9ہے سوشل میڈیا سے تعلق رکھنے والے 3اور سیاحت کے حوالے سے شہرت پانے والے 6افراد کو اس فہرست میں جگہ ملی ہے ان میں 5ایسی شخصیات بھی ہیں جو اسلام کے عظیم داعی بن گئے، 7ایسی شخصیات کو لیا گیا ہے جنہیں کسی ایک شعبے تک محدود نہیں کیا جا سکتا ان میں سے ہر ایک اپنی ذات میں انجمن ہے ایسی ورسٹائل یا ہمہ جہت شخصیات میں ایک معذور نو مسلم رابرٹ ڈبلیو ڈیویلا کانام سرفہرست آتا ہے یہ اپاہچ امریکی عیسائی کلیسا کے زیر انتظام چلنے والے بوڑھوں کے مر کز یا اولڈ ہاوس میں بستر پر پڑا تھا ایک رات اس کو حضور نبی کریم ﷺکی زیا رت ہوئی جا گنے کے بعد اُس نے نیٹ پر سرچ کر کے اسلام کا مطالعہ کیا اور خود کلمہ سیکھ کر مسلمان ہوا، پھر اُس نے نیٹ پر ہی استاد ڈھونڈکر قرآن پڑھنا شروع کیا، پھر ایک مصری مرتد نو جوان کو اس نے مسلمان کیا مقامی مسجد کے امام مولانا نعمان نے اس کو ولی کامل کا نام دیا ہے مرنے سے پہلے وہ وہیل چیر پر مسجد بھی جانے لگا تھا اس کی کہا نی حیرت انگیز کہانی ہے دوسرے امریکی نو مسلم ڈاکٹر جوزف لمبارٹ کا قصہ بھی عجیب ہے اس کا اسلامی نا م شیخ شاکر عبد الحق ہے، انہوں نے چرچ میں پرورش پائی جب جارج واشنگٹن یو نیورسٹی میں پرو فیسر سید حسین نصر سے ان کی ملا قات ہوئی تو اسلام کا مطالعہ کیا اور مسلمان ہوا پھر انہوں نے مغرب میں مسلمانوں کی بنیاد پرستی کے حوالے سے پائی جا نے والی غلط فہمیوں کے خلاف دلائل و براہین کے ساتھ تحقیقی کتابیں لکھ کر اسلام اور مسلمانوں کا دفاع کیا ان میں سے ایک ایمان افروز کہانی مادام شہدا ڈیوٹ کی بھی ہے اس کا مسیحی نام شنیڈا کو نور تھا آئیر لینڈ کی مشہور سنگر (Singer) تھی 30سال کی عمر میں اس کے البم یورپ اور امریکہ میں مشہور ہوئے تھے، اُس نے آئیرلینڈ کے مسلمان پا کستانی نژاد داعی شیخ عمر القادری کے سامنے اسلا م قبول کیا، بقیہ زندگی اس نے حجاب پہن کر اسلا م کی دعوت پھیلا نے میں گذاری جب ان کی وفات ہوئی تو ہزاروں مسلمانوں نے جنازے میں شر کت کی شیخ عمر نے خود نماز پڑھائی ایسی ہی کہانی اطالوی فلم سٹار مار شلا اینجلوکی ہے مصر میں فلم کی شو ٹنگ کے دوران اس نے مسلمانوں کو مسجد سے نکلتے ہوئے دیکھا، وہ یہ دیکھ کر حیران رہ گئی کہ کوئی مرد آنکھ اٹھا کر اس کے بے پردہ جسم کو نہیں دیکھتا ہے اُس نے بات شروع کی تو سب نے بیٹی اور بہن کہہ کر اُس کو مخاطب کیا واپس اٹلی جا کر وہ روم کے اسلامک سنٹر میں گئی خود بھی مسلمان ہوئی اپنے غیر محرم دوست لڑکے کو بھی مسلمان کیا مولوی نے اس کے دوست سے اس کا نکاح پڑھوایا دوست کا نام عبد اللہ اور اس کا نام فاطمہ عبد اللہ رکھا، اس طرح ہر نو مسلم کی کہا نی اپنے اندر عبرت، دعوت اور ایمانی طاقت کے کئی پہلو رکھتی ہے نو مسلم شخصیات کے یہ حالات ملکی اخبارات اور رسائل و جرائد کے لئے الگ الگ کالم کی صورت میں لکھے گئے تھے کتاب میں ان کو یکجا کرنے کے بعد ان میں ایسا باہمی ربط پیداہوگیا ہے کہ ایک ہی نشست میں ایک ہی کتاب کے لئے لکھے ہوئے مضا مین کا گماں ہوتا ہے اور یہ مصنف مولانا ضیا ء الرحمن چترالی کے فکر و فن اور زور قلم کا اعجاز ہے کتاب کا ابتدائیہ 60صفحات میں مذہب کی ضرورت اور اہمیت کا بخو بی احاطہ کرتا ہے اور مذاہب عالم میں اسلام کی حقانیت و صداقت کا مدلل بیا نیہ پیش کر تا ہے دنیا بھر سے جو رپورٹیں آتی ہیں ان کی رو سے ہر سال کم و بیش 3000لو گ حلقہ بگوش اسلا م ہوتے ہیں یہ کشش اور یہ طاقت کسی اور ہم عصر مذہب میں نہیں۔
