دانش سکول منصوبہ: سید آباد میں 3 ارب روپے کے تعلیمی منصوبے پر کام تیز

چترال (چترال ایکسپریس) ترجمان پاکستان مسلم لیگ ن ضلع چترال نیاز اے نیازی ایڈووکیٹ نے کہا ہے کہ وزیرِاعظم شہباز شریف کی خصوصی دلچسپی کے تحت سید آباد کے مقام پر قائم ہونے والے دانش اسکول منصوبے پر تعمیراتی کام تیزی سے جاری ہے۔ اس اہم تعلیمی منصوبے کی مجموعی لاگت تقریباً 3 ارب روپے بتائی گئی ہے۔

مشیر انجینئر محمد اعظم کے مطابق منصوبے کی بروقت تکمیل کو یقینی بنانے کے لیے کام میں مزید تیزی لائی جا رہی ہے، جبکہ موقع پر تکنیکی امور کی نگرانی مشاورتی کمپنی اے ایم سی کے موقع انجینئر، رہائشی انجینئر اور دیگر متعلقہ عملہ کر رہا ہے۔

انہوں نے بتایا کہ اس منصوبے پر تعمیراتی کام ٹھیکیدار کمپنیوں اے ایس ایم ڈی پرائیویٹ لمیٹڈ اور ایل ایم سنز اسلام آباد کے مشترکہ اشتراک کے تحت جاری ہے، جو مقررہ معیار اور رفتار کے ساتھ تعمیراتی سرگرمیاں انجام دے رہی ہیں۔

ترجمان پاکستان مسلم لیگ ن چترال نیاز اے نیازی ایڈووکیٹ نے کہا ہے کہ دانش اسکول جیسے منصوبے علاقے میں تعلیمی ترقی کے لیے سنگِ میل ثابت ہوں گے اور اس سے مقامی طلبہ کو معیاری تعلیم کی بہتر سہولیات میسر آئیں گی۔

اس خبر کو پرنٹ میں حاصل کریں