پراونشل ڈرگ انسپکٹرڈاکٹر نعمت اللہ خان کے زیر صدارت ڈسٹرکٹ ڈرگ کنٹرول کمیٹی چترال کا اجلاس

چترال (چترال ایکسپریس)ڈسٹرکٹ ہیلتھ آفس لویر چترال کے کانفرنس روم میں پراونشل ڈرگ انسپکٹرڈاکٹر نعمت اللہ خان کے زیر صدارت ڈسٹرکٹ ڈرگ کنٹرول کمیٹی چترال کا اجلاس منعقد ہوا جس میں تمام لائسنس یافتہ فارماسیوٹیکل ڈسٹری بیوٹرزاور ہیلتھ ڈیپارٹمنٹ کے حکام شریک ہوئے۔ اجلاس میں ڈائریکٹر جنرل ڈرگ کنٹرول اینڈ فارمیسی سروسزخیبر پختونخوا کی رہنمائی اور ضلعی انتظامیہ لوئر چترال اور ڈی ایچ او لوئر چترال کی تعاون سے ڈرگ ایکٹ 1976ء پر مکمل عملدرامد کرنے ، غیر قانونی ادویات کی روک تھام، لائسنسوں کی اجراء اور تجدید کے معاملات پر بھی غور وحوض ہوا۔ اس موقع پر عوام کو موثر، محفوظ اور معیاری ادویا ت کو یقینی بنانے کے ساتھ ساتھ اس سلسلے میں عوامی آگہی پید ا کرنے پر بھی تفصیل سے غور کیا گیا۔اجلاس میں سال 2026ء کے لئے اپریشنل اینڈریگولیٹری پلان ترتیب دیتے ہوئے اس بات پر زور دیا گیا کہ مارکیٹ میں درست ادویات کی فراہمی کے بارے میں تمام قواعد وضوابط پر سوفیصد عمل کیا جائے گا اور اس بارے میں کسی کمی بیشی کا موقع فراہم نہ کیا جائے۔ چترال فارماڈسٹری بیوشن کونسل کے صدر فخر عالم نے آگہی سیشن منعقد کرنے پر ڈرگ انسپکٹر کا شکریہ ادا کیا اور آئندہ کے لئے اس سلسلے میں اپنی مکمل تعاون کا یقین دلایا۔

اس خبر کو پرنٹ میں حاصل کریں