کلام: دین محمد ندیم

 چترال ایکسپریس ۔۔۔۔

 ہنون تہ فراق مت غم بیتی شیر

     الفتوروشت دنیا مت شام بیتی شیر

 شکر شومان محفلدار غیژی آسوم

        زیدانو گوچہ مت آرام بیتی شیر

وانون گلشناری بیری تھورنی دی خور

       گلہ وامو کو کی گلفام بیتی شیر

 ہرای خاشیو سوم وا زوخ مہ ہوستہ

       زندگی ہے قسمہ تمام بیتی شیر

غذار دی پروشٹی لاکھی آچی غیستی

      ہر ای تدبیر دی مہ نا کام بیتی شیر

کوسیتام وفا نام دنیا مشکی

       لفظ وفا جعفو نام بیتی شیر

وامسار کیاغ مشکس نادان فلکئے

      زندگی مہ برائے نام بیتی شیر

ہر دی ہردیا دویاں تہ پوشیکو

   مہ دنیا خور  تہ  خور مقام بیتی شیر

لالچ فریبو چے حرصو یہ دنیا

    ما چوڑیو خذمت مو آنجام بیتی شیر

دنیا ئے دونوای مثال ہیہ دی

     ساقیو ہوستہ خالی جام بیتی شیر

ہوسیکو دوستان دی خوشان جا شونیان

    تہ چھوم ہو سیک مہ سورا وام بیتی شیر

رقیب ہنون انگار بہا نہ مشکیران

نہ پونہ راہہ کیہ سلام بیتی شیر

  بس آنوسانو چے سالو وا کیا لو

     ہوش نو آریتام صبح و شام بیتی شیر

عقلو دانشوچے شہرتو جنجال

    مبارک تتے تاکی نام بیتی شیر

دوناو تہ وعشقہ ہمیش آشرو غیھچی

    ہوستہ کا غذ یا مہ قلم بیتی شیر

ہنون تتے عید وا دید مبارک

    ندمیوت عیددی نون ماتم بیتی شیر

اس خبر پر تبصرہ کریں۔ چترال ایکسپریس اور اس کی پالیسی کا کمنٹس سے متفق ہونا ضروری نہیں
زر الذهاب إلى الأعلى
error: مغذرت: چترال ایکسپریس میں شائع کسی بھی مواد کو کاپی کرنا ممنوع ہے۔