آئی یو سی ٹی 34 پھستی میں گزشتہ 15 دنوں سے ٹیلی نار سروسز معطل، عوام کو شدید مشکلات کا سامنا
34چترال (چترال ایکسپریس)آئی یو سی ٹی (IUCT 34) پھستی میں گزشتہ 15 دنوں سے ٹیلی نار (Telenor) کا سگنل مکمل طور پر غائب ہونے کی وجہ سے علاقے کے عوام کو سخت پریشانی اور رابطے کی بنیادی سہولت سے محرومی کا سامنا ہے۔
ذرائع کے مطابق علاقے میں نصب ٹیلی نار ٹاور کا سولر سسٹم خراب ہو چکا ہے، جبکہ ہنگامی بنیادوں پر بجلی کی فراہمی کے لیے جنریٹر کا بھی کوئی مناسب انتظام یا بندوبست موجود نہیں ہے۔ بجلی کا متبادل نظام نہ ہونے کے باعث ٹاور مکمل طور پر بند پڑا ہے، جس کی وجہ سے پھستی اور ملحقہ علاقوں کا مواصلاتی رابطہ دیگر دنیا سے کٹ کر رہ گیا ہے۔
سگنل کی مسلسل عدم دستیابی سے نہ صرف عام شہری، بلکہ طلبہ، کاروباری طبقہ اور مریضوں کے لواحقین شدید ذہنی و عملی مشکلات کا شکار ہیں۔ مقامی لوگوں کا کہنا ہے کہ موجودہ دور میں موبائل اور انٹرنیٹ سروس بنیادی ضروریات میں شامل ہیں، لیکن ٹیلی نار انتظامیہ کی غفلت کے باعث 15 دن گزرنے کے باوجود مسئلے کے حل کے لیے کوئی عملی قدم نہیں اٹھایا گیا۔
اہالیانِ پھستی نے متعلقہ اعلیٰ حکام اور ٹیلی نار کے بالا حکام سے پرزور مطالبہ کیا ہے کہ اس سنگین مسئلے کا فوری نوٹس لیا جائے۔ ٹاور کے سولر سسٹم کی فوری مرمت کروائی جائے اور متبادل کے طور پر جنریٹر کے ایندھن و دیکھ بھال کا مستقل انتظام یقینی بنایا جائے تاکہ علاقے میں ٹیلی نار سروسز جلد از جلد بحال ہو سکیں۔
عوام نے سوال اٹھایا ہے کہ جدید دور میں بھی پھستی کے لوگ کب تک اس بنیادی مواصلاتی سہولت سے محروم رہیں گے؟ اگر سروس فوری بحال نہ کی گئی تو وہ احتجاج پر مجبور ہوں گے۔
