پروفیسر عبدالفتاح نے گورنمنٹ پوسٹ گریجویٹ کالج آف منیجمنٹ سائنسز چترال کے پرنسپل کا عہدہ سنبھال لیا
چترال (چترال ایکسپریس):گورنمنٹ پوسٹ گریجویٹ کالج آف منیجمنٹ سائنسز چترال میں انتظامی تبدیلی عمل میں آئی ہے۔ پروفیسر عبدالفتاح
نے کالج کے نئے پرنسپل کی حیثیت سے اپنے عہدے کا چارج سنبھال کر باقاعدہ ذمہ داریاں ادا کرنا شروع کر دی ہیں۔
تفصیلات کے مطابق، سابق پرنسپل پروفیسر وجیہہ الدین 60 برس کی عمر مکمل ہونے پر ملازمت سے سبکدوش (ریٹائر) ہو گئے ہیں۔ پروفیسر وجیہہ الدین تین ماہ قبل ہی پرنسپل کے عہدے پر فائز ہوئے تھے۔
نئے تعینات ہونے والے پرنسپل پروفیسر عبدالفتاح کا تعلق دروش سے ہے۔ وہ اس سے قبل اسی کالج میں شعبہ انگریزی کے سینئر استاد کی حیثیت سے خدمات انجام دے رہے تھے اور حال ہی میں گزشتہ مہینوں کے دوران انہیں گریڈ 20 میں ترقی دی گئی تھی۔
کالج کے اساتذہ، انتظامی عملے اور طلبہ نے نئے پرنسپل کے لیے نیک خواہشات کا اظہار کرتے ہوئے امید ظاہر کی ہے کہ ان کی قیادت میں ادارہ تعلیمی و انتظامی میدان میں مزید ترقیاں حاصل کرے گا۔
