انسانیت کی حقیقی خدمت: ہلال احمر کی ٹیم نے ایک ہفتے سے لاپتہ نوجوان کی لاش پہاڑوں سے منتقل کردی

چترال (چترال ایکسپریس) پاکستان ریڈ کریسنٹ سوسائٹی کی کمیونٹی ڈیزاسٹر ریسپانس ٹیم (CDRT) بندوگول اپر چترال نے انسانیت کی خدمت کی ایک اور قابلِ تحسین مثال قائم کرتے ہوئے ایک ہفتے سے لاپتہ نوجوان کی لاش دشوار گزار پہاڑی علاقے سے تلاش کرکے محفوظ مقام تک منتقل کردی۔

تفصیلات کے مطابق بندوگول، اپر چترال کے ناہموار پہاڑی علاقے میں ایک نوجوان کے گمشدہ ہونے کی اطلاع موصول ہونے پر ہلال احمر کی CDRT ٹیم نے فوری کارروائی کرتے ہوئے مقامی رضاکاروں کے ہمراہ سرچ آپریشن شروع کیا۔ مسلسل کوششوں کے بعد ٹیم نے لاپتہ نوجوان کی لاش کو تلاش کرلیا، جو افسوسناک طور پر جاں بحق ہوچکا تھا۔

ریسکیو آپریشن کے دوران دشوار گزار راستوں اور سخت موسمی و جغرافیائی حالات کے باوجود ٹیم نے پیشہ ورانہ مہارت کا مظاہرہ کرتے ہوئے خصوصی CDRT اسٹریچر آلات کی مدد سے لاش کو پہاڑوں سے نیچے منتقل کیا۔

ہلال احمر حکام کے مطابق یہ آپریشن دور افتادہ اور مشکل رسائی والے علاقوں میں کمیونٹی ڈیزاسٹر ریسپانس ٹیموں کی اہمیت کو اجاگر کرتا ہے، جہاں بروقت امدادی کارروائیاں انسانی جانوں اور کمیونٹی کی مدد کے لیے انتہائی اہم کردار ادا کرتی ہیں۔

پاکستان ریڈ کریسنٹ سوسائٹی نے اس عزم کا اعادہ کیا ہے کہ وہ مستقبل میں بھی انسانی ہمدردی اور کمیونٹی کی فلاح و بہبود کے لیے اپنی خدمات جاری رکھے گی۔

اس خبر کو پرنٹ میں حاصل کریں