کور کمانڈر 11 کور لیفٹیننٹ جنرل عمر احمد بخاری نے یونیورسٹی آف چترال میں جدید اسپورٹس کمپلیکس کا سنگِ بنیاد رکھ دیا
چترال (چترال ایکسپریس)یونیورسٹی آف چترال میں نوجوانوں کی جسمانی و فکری صلاحیتوں کو نکھارنے اور کھیلوں کے فروغ کے لیے ایک جدید اسپورٹس کمپلیکس کی تعمیر کا سنگِ بنیاد رکھ دیا گیا۔ سنگِ بنیاد کی وقار تقریب کے مہمانِ خصوصی کور کمانڈر 11 کور پشاور لیفٹیننٹ جنرل عمر احمد بخاری تھے، جبکہ انسپکٹر جنرل فرنٹیئر کور (IGFC) جنرل راؤ عمران سرتاج بھی ان کے ہمراہ موجود تھے۔
یونیورسٹی آمد پر
وائس چانسلر پروفیسر ڈاکٹر حاضر اللہ، ڈپٹی کمشنر لوئر چترال احسان اللہ اور ڈائریکٹر ایڈمنسٹریشن سمیت سینئر انتظامی حکام نے معزز مہمانوں کا گرم جوشی سے استقبال کیا۔
وائس چانسلر نے 
مہمانوں کا شکریہ ادا کرتے ہوئے کہا کہ کھیل نوجوانوں میں نظم و ضبط، ٹیم ورک اور مثبت سرگرمیوں کو فروغ دینے میں بنیادی کردار ادا کرتے ہیں۔ تقریب کے دوران 107 انجینئر کور کے حکام نے اسپورٹس کمپلیکس کے تکنیکی ڈیزائن، سہولیات اور عمل درآمد کے منصوبے پر تفصیلی بریفنگ دی۔
مجوزہ اسپورٹس کمپلیکس خطے کے نوجوانوں کو بین الاقوامی معیار کی سہولیات فراہم کرے گا، جس میں درج ذیل بنیادی ڈھانچہ شامل ہے:
کھیلوں کے میدان: 1 عدد مرکزی فٹ بال گراؤنڈ اور 2 عدد جدید فٹسال (Futsal) گراؤنڈز۔
معاون سہولیات: اسٹیج، پلیئرز و ٹیم رومز، فرسٹ ایڈ (ابتدائی طبی امداد) روم، واش رومز اور دیگر بنیادی سہولیات۔
تقریب سے خطاب کرتے ہوئے کور کمانڈر لیفٹیننٹ جنرل عمر احمد بخاری نے
متعلقہ حکام کو ہدایت کی کہ منصوبے کو کم سے کم ممکنہ وقت میں معیاری بنیادوں پر مکمل کیا جائے تاکہ طلبہ جلد از جلد اس سے مستفید ہو سکیں۔ انہوں نے عزم ظاہر کیا کہ وہ اسپورٹس کمپلیکس کی مکمل تیاری کے بعد اس کے باقاعدہ افتتاح کے لیے دوبارہ یونیورسٹی کا دورہ کریں گے۔ انہوں نے اس سہولت کی پائیداری، دیکھ بھال اور مؤثر استعمال کو یقینی بنانے پر بھی زور دیا۔
وائس چانسلر پروفیسر ڈاکٹر حاضر اللہ اور یونیورسٹی انتظامیہ نے
پاک فوج بالخصوص کور کمانڈر 11 کور کی ذاتی دلچپی اور تعاون کا خصوصی شکریہ ادا کیا۔ انہوں نے یقین دہانی کرائی کہ اسپورٹس کمپلیکس کا بہترین استعمال اور دیکھ بھال یقینی بنائی جائے گی۔
یونیورسٹی انتظامیہ کے مطابق چترال جیسے دور افتادہ اور جغرافیائی طور پر دشوار گزار علاقے میں اس جدید کمپلیکس کی تعمیر نہ صرف یونیورسٹی کے طلبہ بلکہ پورے چترال کے نوجوانوں کو مثبت اور صحت مندانہ سرگرمیوں کی طرف راغب کرنے میں سنگِ میل ثابت ہوگی۔
