مسلم لیگ (ن) کے رہنما نیاز اے نیازی ایڈوکیٹ کی اسلام آباد میں اہم ملاقاتیں، چترال کی سڑکوں پر کام دوبارہ شروع کرنے کے لیے اقدامات
اسلام آباد (چترال ایکسپریس ):پاکستان مسلم لیگ (ن) چترال کے ضلعی رہنما نیاز اے نیازی ایڈوکیٹ نے اسلام آباد میں چیئرمین وزیراعظم انسپکشن کمیشن بریگیڈیئر مظفر رانجھا اور نیشنل ہائی وے اتھارٹی (این ایچ اے) کے اعلٰی حکام سے اہم ملاقات کی، جس میں ضلع چترال کی مختلف زیر تعمیر سڑکوں، بالخصوص گرم چشمہ روڈ پر کام کی بندش کا معاملہ اٹھایا گیا۔
ملاقات کے دوران نیاز اے نیازی ایڈوکیٹ نے چیئرمین انسپکشن کمیشن
اور این ایچ اے حکام کو گرم چشمہ روڈ پر اسفالٹ (لک بچھانے) کے کام کی بندش سے پیدا ہونے والی مشکلات سے تفصیل سے آگاہ کیا اور درخواست کی کہ عوامی مفاد کے پیش نظر اس پر کام کا فوری دوبارہ آغاز کیا جائے۔
چیئرمین وزیراعظم انسپکشن کمیشن بریگیڈیئر مظفر رانجھا نے معاملے کا فوری نوٹس لیتے ہوئے متعلقہ حکام کو ہدایات جاری کیں، جس کے نتیجے میں گرم چشمہ روڈ پر اسفالٹ بچھانے کا کام آج سے ہی دوبارہ شروع کر دیا گیا ہے۔
ملاقات میں دیگر اہم منصوبوں سے متعلق درج ذیل پیش رفت سامنے آئی:
- بونی بوزند روڈ: نیاز اے نیازی ایڈوکیٹ نے بونی بوزند روڈ پر کام کی بندش کا معاملہ بھی اٹھایا، جس پر فوری اقدامات کا اعادہ کیا گیا۔
- کلاش ویلیز روڈ: کلاش وادیوں کی سڑک کے لیے زمین کے مالکان کو صوبائی حکومت کی جانب سے اگلے چند دنوں میں معاوضے کی ادائیگی یقینی بنائی جائے گی۔
- چترال بونی روڈ: حکام نے یقین دہانی کرائی کہ چترال بونی روڈ کا کام موجودہ سیزن کے دوران ہی مکمل کر لیا جائے گا۔
عوامی حلقوں نے نیاز اے نیازی ایڈوکیٹ کی ان کاوشوں کو سراہتے ہوئے امید ظاہر کی ہے کہ ان منصوبوں کی بروقت تکمیل سے علاقے میں آمدورفت کی سہولیات میں نمایاں بہتری آئے گی۔
