چترال یونیورسٹی کے ڈاکٹرشاہ فہد کو بین الاقوامی گرانٹ مل گئی

چترال(چترال  ایکسپریس )یونیورسٹی آف چترال کے فیکلٹی رکن ڈاکٹر شاہ فہد علی خان کو سال 2026 کے Sophie Danforth Conservation Biology Fund کی جانب سے گرانٹ فراہم کی گئی ہے، جو Roger Williams Park Zoo کے زیرِ انتظام ہے۔

گرانٹ کا باضابطہ خط جامعہ کے وائس چانسلر پروفیسر حاضر الله نے ایک مختصر تقریب کے دوران ڈاکٹر شاہ فہد علی خان کے حوالے کیا۔

اس منصوبے کا عنوان “ضلع چترال کے اساتذہ کو جنگلی حیات اور ماحولیاتی تحفظ کو تدریس کا حصہ بنانے کے لیے بااختیار بنانا” ہے، جس کے تحت چترال ٹاؤن کے ثانوی سکولوں کے حیاتیات کے اساتذہ کو تربیت دی جائے گی۔ تربیتی پروگرام میں مقامی ماحولیاتی مسائل جیسے موسمیاتی تبدیلی، قدرتی مساکن کی تباہی، انسان اور جنگلی حیات کے درمیان تنازعات، اور اہم انواع کے تحفظ پر خصوصی توجہ دی جائے گی، جن میں مارخور، س و لیپرڈ اور ہمالین ائیبکس شامل ہیں۔

اس منصوبے کے ذریعے اساتذہ کو عملی مہارتیں فراہم کی جائیں گی تاکہ وہ ان موضوعات کو موجودہ ثانوی حیاتیات کے نصاب میں مؤثر انداز میں شامل کر سکیں۔

جامعہ چترال نے Sophie Danforth Conservation Biology Fund اور Roger Williams Park Zoo کا ہندوکش کے خطے میں ماحولیاتی تعلیم کے فروغ کے لیے تعاون پر شکریہ ادا کیا ہے۔ یہ منصوبہ جامعہ کے کمیونٹی روابط اور چترال میں ماحولیاتی شعور کے فروغ کے عزم کا مظہر ہے۔

اس خبر کو پرنٹ میں حاصل کریں