شاہد حسین ڈسٹرکٹ ایجوکیشن آفیسر (ڈی ای او) لوئر چترال تعینات، نوٹیفیکیشن جاری
چترال(بشیر حسین آزاد)حکومتِ خیبر پختونخوا نے محکمہ ابتدائی و ثانوی تعلیم میں بڑے پیمانے پر تبادلے اور تعیناتیوں کا فیصلہ کرتے ہوئے شاہد حسین
کو ڈسٹرکٹ ایجوکیشن آفیسر (DEO) لوئر چترال تعینات کر دیا ہے۔ اس سلسلے میں باقاعدہ نوٹیفیکیشن جاری کر دیا گیا ہے جس کا اطلاق فوری طور پر ہوگا۔
محکمہ تعلیم کی جانب سے جاری کردہ اعلامیہ نمبر SO(EMC)/E&SED/DEQs/57 کے مطابق، عوامی مفاد کو مدنظر رکھتے ہوئے شاہد حسین کا تبادلہ کیا گیا ہے۔ وہ اس سے قبل ڈائریکٹوریٹ آف ایلیمنٹری اینڈ سیکنڈری ایجوکیشن پشاور میں بطور ڈپٹی ڈائریکٹر پلاننگ اینڈ ڈویلپمنٹ (منصوبہ بندی و ترقی) اپنی خدمات انجام دے رہے تھے۔
نو منتخب ڈی ای او شاہد حسین ایک تجربہ کار افسر ہیں اور وہ ماضی میں بھی چترال میں اہم عہدوں پر فائز رہ چکے ہیں۔ انہوں نے ضلع چترال میں بطور ڈپٹی ڈی او (DDO) اور ایس ڈی او (SDO) بھی خدمات سرانجام دی ہیں، جس کی وجہ سے وہ علاقے کے تعلیمی مسائل اور انتظامی امور سے بخوبی واقف ہیں۔
تعلیمی حلقوں اور مقامی عمائدین نے شاہد حسین کی تعیناتی کا خیرمقدم کرتے ہوئے امید ظاہر کی ہے کہ ان کی پیشہ ورانہ مہارت اور سابقہ تجربے کی روشنی میں لوئر چترال میں تعلیم کے معیار اور انتظامی امور میں مزید بہتری آئے گی۔
