لواری ٹنل میں افسوسناک حادثہ: ڈی سی لوئر چترال مقبول حسین گاڑی ٹرک سے ٹکرانے کے باعث زخمی
چترال (چترال ایکسپریس)لواری ٹنل کے اندر پیش آنے والے ایک سڑک حادثے میں ڈپٹی کمشنر لوئر چترال مقبول حسین زخمی ہو گئے ہیں۔ ابتدائی طور پر حاصل ہونے والی علاج و معالجے کی تفصیلات کے مطابق اب ان کی حالت خطرے سے باہر ہے۔
تفصیلات کے مطابق جمعہ کی صبح تقریباً 6 بجے ڈی سی لوئر چترال مقبول حسین کی سرکاری گاڑی لواری ٹنل سے گزر رہی تھی کہ اندر سامنے سے آنے والے ایک مال بردار ٹرک سے جا ٹکرائی۔ شدید تصادم کے نتیجے میں سرکاری گاڑی کا اگلا حصہ برے طریقے سے متاثر ہوا اور ڈی سی لوئر چترال زخمی 
ہو گئے۔
حادثے کی اطلاع ملتے ہی ایمرجنسی ریسکیو ٹیمیں اور سیکیورٹی اہلکار فوری طور پر ٹنل کے اندر جائے وقوعہ پر پہنچ گئے۔ ریسکیو اہلکاروں نے کارروائی کرتے ہوئے ڈی سی مقبول حسین کو گاڑی سے باہر نکالا اور ابتدائی طبی امداد کے لیے ڈسٹرکٹ ہیڈ کوارٹرز (DHQ) ہسپتال اپر دیر منتقل کیا۔
ایمرجنسی حکام کے مطابق اپر دیر ہسپتال میں ضروری طبی امداد فراہمی کے بعد انہیں مزید علاج کے لیے پشاور ریفر کر دیا گیا ہے، جہاں ان کی حالت خطرے سے باہر بتائی جاتی ہے۔
حادثے کے باعث لواری ٹنل کے اندر شاہراہ پر کچھ دیر کے لیے ٹریفک کی روانی معطل رہی اور دونوں جانب گاڑیوں کی معمولی قطاریں لگ گئیں۔ بعد ازاں ریسکیو ٹیموں کی جانب سے حادثے کا شکار گاڑیوں کو ہٹا کر شاہراہ کو ٹریفک کے لیے مکمل طور پر بحال کر دیا گیا۔
