سرحد رورل سپورٹ پروگرام کے غربت مکاؤ پراجیکٹ (پی پی آر) کے تحت ڈسٹرکٹ ڈیویلپمنٹ پلیٹ فارم کا انعقاد

چترال ( نمائندہ چترال ایکسپریس) تحصیل ناظم چترال مولانا محمد الیاس نے کہا ہے کہ چترال میں گزشتہ سال کے تباہ کن سیلاب اور زلزلے کی وجہ سے مقامی حکومتوں کے تمام وسائل بعض سہولیات کی بحالی پر صر ف ہوئے جس کے نتیجے میں ترقی کا عمل اور میونسپل سروسز کی فراہمی متاثر ہوکر رہ گئے ہیں جن میں کئی ایک کا تعلق حفظان صحت کے شعبے سے ہے لیکن اس سلسلے میں دروش ٹاؤن میں ایس آر ایس پی کا پراجیکٹ قابل قدر کاوشوں میں مصروف ہے۔ سرحد رورل سپورٹ پروگرام کے غربت مکاؤ پراجیکٹ (پی پی آر) کے تحت ڈسٹرکٹ ڈیویلپمنٹ پلیٹ فارم سے خطاب کرتے ہوئے انہوں نے کہاکہ صحت سے متعلق مسائل کو بھی جنم دینے کا ذمہ دار بھی ہم خود ہیں اور ان کو حل بھی ہم خود کرسکتے ہیں۔ انہوں نے کہاکہ اسلامی تعلیمات کے عین مطابق طرز زندگی اپنانے سے اورمعاشرے کی بنیادی اکائی خاندان سے ہی اگر صحت اور صفائی کے بارے میں تعلیم و تربیت دی جائے تو اس علاقے میں صحت سے متعلق کوئی مسئلہ پید اہی نہیں ہوسکیں گے۔ انہوں نے دروش کے دو یونین کونسلوں میں پی پی آر کے کام کی تعریف کرتے ہوئے کہاکہ صحت وصفائی کے بارے میں عوامی آگہی پھیلانے اور کمیونٹی کی استعداد کار کو بڑہانے کے ساتھ ان کو مطلوبہ وسائل کی فراہمی اور انفراسٹرکچر کی بحالی ومرمت بہت ہی دور رس نتائج کے حامل اقدامات ہیں۔ اس سے قبل پی پی آر کے ڈسٹرکٹ ہیلتھ افیسر جاوید احمد نے کہاکہ ڈسٹرکٹ ڈیویلپمنٹ فورم منعقد کرکے ہیلتھ اور ہائی جین سے متعلق مسائل کو ضلعے کی سطح پر اجاگر کرنے کا موقع فراہم کیا جاتا ہے جوکہ پراجیکٹ کے مقاصد میں سے ایک ہے۔ انہوں نے کہا کہ دروش کے دو یونین کونسلوں میں صحت کے شعبے سے متعلق اس پراجیکٹ میں نئی انداز میں کام کیا جارہاہے اور اس میں منتخب بلدیاتی نمائندوں اور محکمہ صحت کے افسران کا بھر پور تعاون حاصل رہا ہے ۔ کمیونٹی کے نمائندے اور بلدیات کے منتخب کونسلر وں نے اس موقع پر صحت وصفائی سے متعلق مختلف مسائل بیان کئے جن میں دروش کی ایک دورافتادہ اور پسماندہ وادی بیوڑی میں میٹرنٹی ہوم قائم کرنے ، دروش کے تحصیل ہیڈ کوارٹرز ہسپتال میں جمع ہونے والی غلاظتوں کو محفوظ طور پر ٹھکانے لگانے کا انتظام کرنا شامل تھے۔ اس موقع پر ویلج ناظم عمران الملک، سابق یو سی ناظم حیدر عباس، اشفاق احمد نے مختلف مسائل بیان کئے۔ پی ٹی آئی کے رہنما اور ارندو سے تحصیل کونسل کے ممبر حاجی محمد سلطان نے کہاکہ چترال کے ضلعے میں داخل ہونے کے بعد دروش پہلا ٹاؤن ہے جس کی وجہ سے اس ٹاؤن کو صاف شفاف رکھنے کی شدید ضرورت ہے ۔ا نہوں نے ایس آرایس پی کی کارکردگی کی تعریف کرتے ہوئے ادارے کے چیف ایگزیکٹیو افیسر شہزادہ مسعود الملک کی کوششوں کو قابل قدر قرار دیتے ہوئے کہاکہ وہ اس علاقے کی طرف خصوصی توجہ دے رہے ہیں۔

اس خبر پر تبصرہ کریں۔ چترال ایکسپریس اور اس کی پالیسی کا کمنٹس سے متفق ہونا ضروری نہیں

اترك تعليقاً

زر الذهاب إلى الأعلى
error: مغذرت: چترال ایکسپریس میں شائع کسی بھی مواد کو کاپی کرنا ممنوع ہے۔