بروغل ویلی میں منعقدہ تین روزہ بروغل فیسٹول2023 اختتام پذیر
- چترال (نمائندہ چترال ایکسپریس ) ڈسٹرکٹ ایڈمنسٹریشن اپر چترال کے تعاون سے سطح سمندر سے تقریباً ساڑے چودہ ہزار فٹ کی بلندی پر واقع بروغل ویلی میں منعقدہ بروغل فیسٹول2023 تین دن تک رنگینیاں بکھیرنے کے بعد
اختتام پذیرہو گیا۔ فیسٹول میں پہاڑی علاقوں کے مقبول کھیل پولو، یاک پولو،بُز کشی، گدھا پولو،کرکٹ اور فٹ بال کے دلچسپ مقابلے ہوئے۔یاک پولو کا فائنل گاریل کی ٹیم نے پولو کا فائنل چیکار جبکہ بُز کشی کا 
مقابلہ پیچ اوچ کی ٹیم نے جیت لیا۔
کمشنر ملاکنڈ ڈویژن شاہد اللہ نے فیسٹول میں خصوصی طور پر شرکت کرکے اہالیان بروغل اور ان کے کھلاڑیوں کی حوصلہ افزائی کی۔ کمشنر ملاکنڈ شاہدا للہ کے علاوہ ڈپٹی کمشنر اپر چترال خالد زمان، ڈی پی او اپر چترال محمد علیم جان نے انعامات تقسیم کی جس کے بعد تماشائیوں اور سیاحوں سے خطاب کرتے ہوئے کمشنر ملاکنڈ اور ڈی سی اپر چترال نے کہا کہ بروغل فیسٹول منانے کا مقصد چترال کے دوردراز علاقوں میں واقع وادیوں کے خوبصورتی کو دُنیا کے سامنے لانا ہے تاکہ ملکی اور غیر ملکی سیاحوں کے توجہ کو حاصل کیا جا سکے۔جس کے زریعے علاقے سے غربت کو ختم کیا جا سکتاہے۔بروغل فیسٹول کے زریعے سیاحوں کو دلچسپ کھیلوں اور اردگرد35کی تعداد میں گلیشئیرز کے قریبی نظاروں سے لطف اندوز ہونے کا موقع میسر آگیا۔ انہوں نے وادی بروغل کے مسائل کو ترجیحی بنیادوں پرحل کرنے کی یقین دہانی کرائی۔ بروغل کے عمائیدین امین جان تاجک اور دوسروں نے اس دورافتادہ علاقے میں فیسٹول منعقد کرنے اور علاقے کے لوگوں کو تفریح کا موقع فراہم کرنے،یاک پولو کی حوصلہ افزائی اور باہر سے کثیر تعداد میں
لوگوں کو وادی میں آنے کا موقع دینے پر اپر چترال کی ضلعی انتظامیہ کا شکریہ ادا کرتے ہوئے کہاکہ یہ ایونٹ وادی کی ترقی میں سنگ میل ثابت ہوگا۔
اس خبر پر تبصرہ کریں۔ چترال ایکسپریس اور اس کی پالیسی کا کمنٹس سے متفق ہونا ضروری نہیں
